Touch Diamond, rivali i iPhone 3G hidhet në treg në 30 shtete

High Tech Computer (HTC), prodhuesi më i madh në botë i telefonave të zgjuar që përdorin si sistem operativ Microsoft Windows Mobile, deklaroni se aparati i saj Touch Diamond është hedhur në treg nga 50 operatorë në 30 shtete të ndryshme të botës.

Kompania ka në plan që të prodhojë në gjysmën e dytë të këtij viti edhe 4 ose 5 produkte të tjerë të familjes Diamond.

Touch Diamond-i shquhet për formën, ekranin me prekje dhe veçori të tjera që e bëjnë të ngjashëm me iPhone 3G dhe mund të ruajë deri në 4GB skedarë muzikorë, fotografi dhe të dhëna të tjera. Ky produkt pason telefonin HTC Touch që u hodh në qarkullim vitin e shkuar.

HTC deklaroi gjithashtu se ka qenë e sukseshme në përpjeket për të reduktuar koston fillestare të aparateve. Çmimi prej 199 dollarësh që caktoi Apple për iPhone 3G, e vuri nën presion HTC-në, e cila kishte planifikuar ta lëshonte produktin e saj me një çmim prej 783 dollarësh në Tajvan.

Në fillim të muajit, HTC njoftoi se do ta shiste Touch Diamond-in për 98 dollarë, të bashkangjitur me kontrata të ngjashme me ato të iPhone-it. Kontrata e përdoruesit duhej të lidhej me Chunghwa Telecom, operatori më i madh i telefonisë celulare në Tajvan.

Anëtarët e rinj të familjes Diamond do të jenë Touch Pro, një aparat i destinuar për biznesmenët dhe që ka disenjo të ngjashme me Touch Diamond-in.

Touch Pro e ka pjesën e pasme në trajtën e një diamandi të përkulur, njëlloj me sivëllain e tij, por është më i trashë, falë minitastierës QWERTY që rrëshqet nga brenda për ta lehtësuar shtypjen e tastave. Një tjetër veçori e përbashkët me Touch Diamond-in është fakti se edhe Touch Pro është një telefon i zgjuar i brezit të tretë (3G) me një ekran 2.8 polësh, që operon me Windows Mobile 6.1 Professional.

HTC pret që të ardhurat e saj të tremujorit të tretë të rriten me 30% krahasuar me të njëjtën periudhë të vitit të shkuar, çka tregon një shkallë të lartë besimi në shitjen e aparatëve të familjes Diamond.

HTC zbuloi edhe qëllimin e saj për të prodhuar në tremujorin e katërt të këtij viti një telefon që operon me softuerin Android të Google-it.