Maradona pranë dorëheqjes? Debat me kreun e Federatës

Raportet mes Maradonës dhe drejtuesve të Federatës në Argjentinë duken që tani me probleme. Debati për ndihmës trajnerin ka bërë që tekniku i ri i kombëtares të mendojë edhe dorëheqjen, të paktën sipas asaj që shkruajnë mediat argjentinase.
ARGJENTINE- Diego Armando Maradona rrezikoi të jepte dorëheqjen pas problemeve me shefin e Federatës Hulio Grondona. Një lajm i tillë është publikuar në faqe të parë të të gjitha gazetave në Argjentinë, ndonëse vetë Diego ka siguruar se do të jetë në pankinë në ndeshjen ndaj Skocisë më 19 nëntor. Në fakt, ish-sulmuesi i Napolit kërkon të ketë patjetër në staf Oskar Ruxherin, por emri i tij nuk pëlqehet shumë nga numri 1 i Federatës për shkak se pak kohë më parë ai e ka quajtur publikisht mafioz. Në një nga takimet e fundit, Maradona dhe presidenti Grondona kanë debatuar me tone të ashpra për këtë çështje. Drejtori teknik i kombëtares Karlos Bilardo bëri të ditur se ishte prezent në këtë takim, por Maradona nuk përmendi për asnjë moment fjalën dorëheqje. Ndërkaq, një tjetër çështje për t’u zgjidhur mbetet rroga e Pibe de Oros. Maradona kërkon 3 fishin e asaj që përfitonte paraardhësi i tij Alfio Bazile. Gjithsesi, do të duhen edhe pak ditë për të parë vendimin përfundimtar të trajnerit të Argjentinës. .

» Grupi 1, Portugalia merr kreun, Shqiperia ne vendin e trete