Milan, pas Sheves merr edhe Senderos

Pas Andriy Shevchenkos, Milani merr edhe Filipe Senderos. Mbrojtësi qendror i Zvicrës vjen nga Arsenali me formulën e huazimit, por me mundësinë për t‘u blerë. Ky mbrojtës ka qenë i shumëpritur nga trajneri Karlo Ançeloti. Zvicerani, i datëlindjes 1985, do të vijë te kuqezinjtë, duke mbyllur një tratativë të shpejtë, të nisur vetëm disa ditë më parë pas dëshirës së shprehur nga trajneri Ançeloti, i cili e kishte aprovuar ardhjen e Shevçenkos vetëm në rast se bashkë me të do të vinte edhe një mbrojtës. Ai do të jetë futbollist i Milanit, tek i cili ka mbërritur nga anglezët e Arsenalit me formulën e huazimit. “Topçinjtë” e Londrës do të përfitojnë dy milionë euro nga ky kalim. Por në marrëveshje është parashikuar edhe mundësia e blerjes përfundimtare të mbrojtësit 23-vjeçar. Kartoni i tij mund t‘i kushtojë Milanit plot tetë milionë euro. Gjithashtu, nëse Sederos do të blihet nga klubi i Berluskonit, kontrata që do t‘i vihet përpara për të nënshkruar do të jetë katërvjeçare. Sipas trajnerit Ançeloti, Sederos është një mbrojtës qendror që mund të japë më shumë garanci se sa mbrojtësit aktualë, të cilët janë në skuadër. Tani është mbyllur vërtetë merkatoja e Milanit në hyrje: menjëherë pas ardhjes së Ronaldinjos, në klubin kuqezi kanë mbërritur edhe katër lojtarë, duke filluar nga Shevçenko, Kardaçio, Viudez dhe tashmë Senderos. Më parë ishin blerë Flamini, Zambrota. Milani mban edhe flamurin e skuadrës që ka bërë blerjet më të bujshme në këtë sezon në Itali.