Mungon gjaku per talasemiket

Qendrat e Gjakut dhe rezervat në spitale janë drejt alarmit SOS. Mbyllja e vitit akademik, ardhja e pushimeve dhe pezullimi i operacioneve me planifikim në këtë sezon ka ulur edhe më shumë dhurimet vullnetare si rrjedhojë edhe rezervat e gjakut. Apeli për të dhuruar gjak nga të gjithë qytetarët nuk është ndjerë dhe sensibilizimi i shqiptarëve për të dhuruar gjak ende nuk është kuptuar si një detyrim njerëzor. Kategoritë që ndihmojnë pacientët që kanë nevojë duke dhuruar gjak janë studentët dhe ata tani janë me pushime. Po ashtu familjarët që japin gjak për të ndihmuar të afërmit që do të kryejnë operacione tani janë rralluar. Nisur nga nevojat emergjente dhe nga shkalla e sensibilizimit të shqiptarëve në të gjithë vendin, Shoqata e të sëmurëve me Talasemi ka kërkuar të nisë importi i gjakut, në mënyrë që ata të plotësojnë kërkesat e tyre për të trajtuar sëmundjen. Pavarësisht fushatave të Kryqit të Kuq, pavarësisht apelit të bërë dy muaj më parë, qytetarët nuk janë solidarizuar dhe spitalet nuk po arrijnë të mbulojnë nevojat për gjak. Kërkesa e Shoqatës së të Sëmurëve me Talasemi shtrohet sa herë gjendja përkeqësohet dhe fëmijët nuk trajtohen dot për problemet e tyre shëndetësore. Deri tani nuk ka pasur asnjë reagim nga shëndetësia. Importi i gjakut vazhdon të përjashtohet si mundësi për të zgjidhur krizën për gjak. Ministria e Shëndetësisë deklaroi dy muaj më parë se në rast krize do të bënte gati dokumentacionin e duhur për sigurimin e flakonëve nga vendet e certifikuara të Bashkimit Evropian. Bashkë me mungesat e gjakut, shtohet edhe mungesa e faktorit 8, medikamenti me të cilin trajtohen hemofilikët. Përveç apelit: “Dhuroni gjak, “Dhuroni gjak” deri tani nuk është kryer asnjë procedurë tjetër për përmirësimin e gjendjes.

Burimi: Gazeta Shqip

rruazat e kuqe ose eritrocitet duan 120 dite qe te piqen por te talasemiket kjo gje nuk ndodh rruazat e tyre jetojne vetem 20 dite prandaj keta persona duhet te bejne per gjiyhe jeten transfuzion gjaku