Moti i keq lë pa drita gjysmën e vendit

Gjysma e Shqipërisë është gdhirë dje me mungesë të furnizimit me energji elektrike, si rrjedhojë e defektit në disa nga linjat transmetuese të elektricitetit.

Shkak për këtë është bërë moti i keq, i karakterizuar nga reshje të dendura dhe stuhi e fortë, duke ndikuar në shkëputjen e linjave elektrike në disa qytete të vendit.

Moti i keq, gjatë orëve të para të ditës së diel, solli pasoja negative për pajisjet elektrike të Operatorit të Sistemit të Shpërndarjes, i cili në të gdhirë ka nisur punën për normalizimin e situatës.

Shkëputja e linjave dhe rrëzimi i shtyllave të energjisë elektrike nga stuhia e madhe u bënë faktori i ndërprerjes së furnizimit me drita, kryesisht për pjesën qendrore të Shqipërisë.

Situata

Mungesa e energjisë elektrike në disa qytete të vendit ka ndikuar negativisht edhe në sektorin e Ujësjellësit. Për këtë qëllim, brigadat e punës pranë OSSH-së, plan të parë kanë pasur rregullimin e atyre linjave që furnizonin me energji elektrike ujësjellësit.

Më i dëmtuari mësohet të kenë qenë fidrat përcjellës pranë ujësjellësit në Rrogozhinë, i cili furnizonte edhe qytetin e Kavajës. Probleme ka pasur edhe qyteti bregdetar i Durrësit,
si dhe zona e Shijakut pranë tij, ku stuhia gjatë natës dëmtoi disa linja të energjisë elektrike.

Deri në orët e pasdites, punonjësit e OSSH-së, të kontaktuar nga
gazeta, janë shprehur se kanë punuar për orë të tëra për të bërë të mundur rikthimin e furnizimit normal me drita.

Masat

Mjaftoi një stuhi vjeshte dhe problemet që karakterizojnë sektorin e energjisë elektrike në vend dolën direkt në pah.

Dje, gjysma e Shqipërisë u gjend pa drita, për shkak të motit të keq, kur ndërkohë dimri nuk ka mbërritur ende. Ekspertët, nga ana e tyre, kanë deklaruar shpesh se shtrirja e linjave përmes ajrit bën të mundur një situatë të tillë kaotike, kur në fakt do të ndodhte e kundërta nëse një pjesë e linjave do të shtriheshin
nën tokë.