Durres- Kukes, 1 kilometër kushton 22 mln euro

Ekspertët kontabël të Prokurorisë tregojnë abuzimin me kontratën pa fond litim të segmentit Rrëshen-Kalimash. Sipas përllogaritjeve 1 km autostradë po ndërtohet me një kosto 22 mln euro, ndërkohë që e njëjta kompani, në kushte të ngjashme, ndërton në Kroaci me 4-5 milionë euro/km. Sipas burimeve zyrtare të akuzës, muaji nëntor do të jetë dhe muaji brenda të cilit do të vendoset për fatin e Lulzim Bashës dhe ish-zyrtarëve të tjerë të Ministrisë së Transporteve, në lidhje me hetimin e abuzimeve me ndërtimin e rrugës Durrës- Kukës.

TIRANE- Kostoja e rrugës Durrës-Kukës-Morinë duket se po kalon edhe parashikimet më pesimiste, të shprehura deri tani nga specialistë apo nga opozita politike shqiptare. Sipas ekspertëve kontabël, të pajtuar nga Prokuroria e Përgjithshme për të analizuar koston e këtij objekti të infrastrukturës, del se vetëm për të ndërtuar rrugën nga Rrësheni në Kalimash, shteti shqiptar duhet të shpenzojë 1 miliard e 300 milionë euro. Ky është vetëm një nga segmentet e rrugës, e cila përfshin veç tij, edhe pjesët nga Kukësi në kufi dhe nga Miloti në Rrëshen. Sipas këtyre përllogaritjeve, rrezikon që e gjithë rruga të afrohet me 2 miliardë eurot, që duket qartë se nuk i është nënshtruar asnjë lloj analize fizibiliteti, pasi është tepër e vështirë për një vend si Shqipëria t'i lejojë luksin e shpenzimeve të tilla, qoftë edhe për investime infrastrukturore.
Sipas Ministrisë së Transporteve, në të dhënat e përgjithshme për kontratën midis saj dhe kompanisë 'Bechtel&Enka' për segmentin në fjalë, përfshihen gjatësia 59 km, fillimi i punimeve 30/10/2006, përfundimi i punimeve 30/06/2009 dhe ndër të tjera, vlerësimi paraprak (target price), 418 milionë euro pa TVSH. Por pas kësaj, qeveria shqiptare ka pranuar se kostoja e rrugës Durrës-Kukës-Morinë do të kushtojë shumë më tepër se sa kontrata fillestare. Në një letër që ajo i ka dërguar më pas Fondit Monetar Ndërkombëtar, është pranuar fakti se kosto e rrugës do të jetë, të paktën, 200 milionë euro më shumë se sa projekti fillestar. Por fakti që tani po flitet për 1,3 miliardë euro, vetëm për një nga segmentet e rrugës, bën që llogaritja të përmbyset krejtësisht. Një km autostradë i bie se po ndërtohet me një kosto 22 mln euro, ndërkohë që e njëjta kompani, në kushte të ngjashme, ndërton në Kroaci me 4-5 milionë euro/km.

Basha hesht
Prej katër ditësh, shefi i diplomacisë shqiptare, ish ministri i Transporteve, ka në dorë raportin e dy ekspertëve kontabël, të cilët kanë vlerësuar koston reale të aksit rrugor Rrëshen-Kalimash, si dhe kanë evidentuar dëmin e shkaktuar shtetit. Burime zyrtare të Prokurorisë së Përgjithshme bënë me dije, se ish-kreu i Transporteve ka kërkuar kohë për të dhënë shpjegime lidhur me shkeljet e evidentuara në raport. Në bazë të ligjit, Lulzim Basha nuk është i detyruar të japë shpjegime, por këtë herë, moralisht, duhet të sqarojë se në xhepat e kujt kanë përfunduar miliona euro. Duke iu referuar burimeve zyrtare të organit qendror të akuzës, muaji nëntor do të jetë dhe muaji brenda të cilit do të vendoset për fatin e Lulzim Bashës dhe ish-zyrtarëve të tjerë të Ministrisë së Transporteve. "Jemi në përfundim të hetimeve dhe do të vendosim për dosjen", - tha një burim zyrtar. Hetimet për Durrës-Kukës janë drejt fundit. Gjasat janë që ndaj Bashës të ngrihet akuzë konkrete, pasi raporti i ekspertëve kontabël, të cilët kanë llogaritur dëmin e shkaktuar për shkak të keqmenaxhimit të fondeve, përmban mjaft fakte që flasin kundra ish-kreut të Transporteve dhe ish-zyrtarëve të tjerë. Deri më tani, në duart e prokurorëve të çështjes nuk ka mbërritur asnjë shpjegim nga ana e shefit të diplomacisë shqiptare, i cili prej të paktën nëntë muajsh është pa imunitet. Shpjegime nuk kanë dhënë as ish-zyrtarët e tjerë, ish-zv/ministri Armand Teliti, ish-drejtori juridik në këtë dikaster, Andi Toma, apo ish-drejtoresha e përgjithshme e Rrugëve, Lejla Saraçi