Kastro Zizo bën klip për tifozët e “çmendur” të Partizanit

Një klip që titullohet “Për jetë me ty” mund t’u duket si tekst dashurie, por jo në këtë rast. Kënga e re e Kastro Zizos titullohet kështu pasi ai si tifoz i skuadrës së Partizanit, e ka shkruar për t’i bërë të ndien krenarë, gjithë tifozët “e çmendur” të kësaj skuadre, dhe si një dedikim kushtuar kryetifozit të ndjerë Toti.
Është e para këngë e tij në ritmin “hard rrock”, por me nota paqësore dhe sens dedikues, dhe që u kushtohet të gjithë mbështetësve të Partizanit, tani që kjo skuadër është në momentin e saj më kritik, sipas Kastros. Dëshira e tij ishte të jetë i pari, që do të mbështesë sportin dhe skuadrën e tij të zemrës “Partizanit”, edhe pse është tifoz edhe i Lacios.
Klipi është realizuar me momente nga golat më të mirë të skuadrës, e ndërthurur me imazhet bardh e zi të vetë Kastros në studion e tij, ndërsa është duke punuar. Kënga do të krijojë kulturën e himnit, refrenin e së cilës fansat do të mund ta këndojnë në stadium, në rastin më të parë që mund të jetë derbi “Partizani-Tirana”. Tani që kjo skuadër është në krizë pasi ka shitur futbollistët më të mirë, ai ka vendosur të nisë këtë fushatë sportive me këtë këngë ndryshe, të realizuar në bashkëpunim me producentin londinez, Tom Gillieron.
Si njohës i mirë i tregut muzikor, pse jo pretendon të ketë fitime me shitjen e klipit tek tifozët. Por pasioni i tij për futbollin nuk mbetet këtu, pasi është nga ata tifozë që hedh baste. Ka arritur të fitojë deri në 200 mijë lekë, por që ka humbur 10- fishin e tyre. Një ves ky i Kastros? Jo. Sepse “që burri të quhet burrë”, thotë Kastro, “duhet të vendosë baste dhe të pijë alkool”.