Lala bëhet operacion: Do jem në fushë ndaj Maltës

Kapiteni kuqezi do operohet nga hernia diskale. Kthehet në fillim të 2009. Altin Lala nuk ka luajtur më që prej ndeshjes së 1 nëntorit ndaj Hamburgut, kur Hanovëri fitoi 3-0. Prej atij takimi, kjo skuadër nuk ka fituar më asnjë ndeshje.

TIRANE- Ishte menduar si një dëmtim i lehtë, por në fakt ka rezultuar më i rëndë nga sa pritej. Altin Lala nuk ka mundur t'i shpëtojë dot operacionit dhe do të qëndrojë të paktën gjashtë javë jashtë fushave të lojës. Vetë futbollisti, por edhe uebsajti zyrtar i klubit të Hanovërit, kanë konfirmuar dje vendimin për kryerjen e operacionit. Kapiteni i kombëtares shqiptare shpresonte shumë që çështja të mos shkonte deri këtu, por hernia diskale nuk ka qenë aq e lehtë sa ç'u mendua në fillim. 32 vjeçari shqiptar është vizituar ditën e hënë nga ish-mjeku i kombëtares gjermane dhe Bajernit të Mynihut Myler Volfhart, i cili ka dhënë idenë e operacionit. Problemet për Lalën nuk kanë qenë shumë të theksuara gjatë javës së shkuar, madje u duk se ai u përmirësua. Por, gjërat kanë ndryshuar, pasi kapiteni kuqezi nuk ka mundur të vijojë rregullisht seancat stërvitore. Operacioni i tij do të bëhet nga doktori i njohur me origjinë iraniane Maxhid Sami, i cili në shtatorin e vitit 2007 pati operuar edhe trajnerin aktual të Bajernit të Mynihut Jurgen Klinsman. Sipas menaxherit të Lalës Harun Arslan, operimi është gjëja më e mirë për t'u bërë në këto momente. "Altini mund të rikthehet të stërvitet fiks në fillim të vitit", sqaroi ai.
Lala
Vetë kapiteni i Shqipërisë Altin Lala ka pranuar se operacioni është një rrugë e domosdoshme për karrierën e tij. "Mund edhe të mos bëhesha operim, por unë jam 32 vjeç dhe dua që ta vazhdoj rregullisht karrierën time", u shpreh mesfushori kuqezi që nga Hanovëri. Lala ka konfirmuar gjithashtu se pas diskutimit me mjekun, koha e rekuperimit do të jetë 6 javë. Në fillim të janarit ai do të rikthehet sërish të stërvitet dhe pritet të jetë gati për ndeshjen e kombëtares ndaj Maltës më 11 shkurt. "Kjo është edhe dëshira ime më e madhe, dua që të jem ndaj Maltës. Besoj se do të rikthehem për atë ndeshje", ka thënë Lala. Ai është shprehur gjithashtu i sigurt për zgjedhjen e bërë. "Unë dua të vazhdoj rregullisht të luaj futboll. Pastaj, këtu në Hanovër kemi doktorë të mirë", tha ai, referuar neurologut iranian Maxhid Sami, i cili është nga mjekët më të famshëm të planetit.