Cana, sot në Liverpul bisedë me Evertonin?

TIRANE- Lorik Cana dhe Olimpiku i Marsejës do të kërkojnë të përsërisin ndeshjen e sezonit të shuar kur të përballen sot në mbrëmje ndaj Liverpulit në "Anfield Road". Skuadra franceze vjen në këtë ndeshje me shanse të pakta për një kualifikim, por është ende në valle për një vend në Kupën UEFA. Natyrisht, një fitore në ndeshjen e sotme do të rindizte shpresat e ekipit të Gerets, por përballë një Liverpuli të etur për sukses nuk do të jetë aspak e lehtë. Vendasit vijnë pas barazimit zhgënjyes ndaj Fulhamit dhe nuk mund t'i lejojnë vetes një tjetër hap falas përpara tifozerisë së tyre të zjarrtë. Për më tepër që Liverpuli është një ekip "ekspert" në Champions League. Megjithatë, nata e sotme mund të kthehet në një natë merkatoje për kapitenin shqiptar të Marsejës Lorik Cana. Ky i fundit shkon në qytetin e Evertonit, ekipit që e ka kërkuar më me ngulm gjatë kësaj periudhe merkatoje. Burime pranë futbollistit të përfaqësueses bëjnë të ditur se pas ndeshjes, Cana mund të ketë një takim me drejtuesit e këtij klubi, që natyrisht do të jenë në stadium për ta ndjekur. Evertoni është edhe klubi që ka bërë ofertën më të lartë financiare për Marsejën deri në këto momente. Klubi nga "Gudison Park" ka ofruar 10 milionë euro për Canën, që nuk janë pranuar nga presidenti Pape Diuf. Ndërsa trajneri i kësaj skuadre, David Mojes, e ka shprehur personalisht simpatinë e tij për Canën.