Tragjedia në Gjirokastër, Topi: Dëmshpërbleni urgjentisht të dëmtuarit

Presidenti Bamir Topi ndërhyn në ditën e katërt të grevës së urisë së banorëve të pallatit të shembur në Gjirokastër. Duke shprehur shqetësimin për situatën në të cilën ndodhen banorët pas tragjedisë së ndodhur jo për faj të tyre presidenti Topi kërkoi: Sa më shpejt dëmshpërblim dhe sistemimin në kushte normale të familjeve të dëmtuara”.


TIRANE- Në ditën e katërt të grevës së urisë banorët e pallatit të shembur në fillim të nëntorit në lagjen “11 janari” të Gjirokastrës kanë vendosur të ngujohen nën gërmadha. Ata kundërshtojnë dhe e quajnë të padrejtë dhe jo koherent me shifrat e tregut, vendimin e qeverisë i cili përcakton skemën e dëmshpërblimit.

Në mbështetje të tyre, gratë dhe fëmijët e kryefamiljarëve të ngujuar janë vendosur në garazh, i vetmi objekt që ka mbetur pa u shembur pas rrëzimit të pallatit.

Presidenti i Republikës, Bamir Topi reagoi sot në mesditë ndaj grevës së banorëve . Nëpërmjet një njoftimi për shtyp kreu i shtetit i kërkon qeverisë dhe institucioneve përkatëse të mbajnë premtimet dhe të dëmshpërblejnë banorët sic iu është premtuar.

“Presidenti i Republikës po ndjek me një shqetësim të veçantë grevën e urisë së banorëve, të cilët prej kaq kohësh nuk po gjejnë zgjidhjen e plotë dhe përfundimtare që u është premtuar për sistemim dhe dëmshpërblim si pasojë e një tragjedie, e cila nuk ndodhi për shkakun e tyre”.- thuhet në njoftimin për shtyp të publikuar sot në faqen zyrtare të Presidencës.

Më tej presidenti thekson se është e drejta legjitime e banorëve për t'u dëmshpërblyer dhe për t'u sistemuar në kushte normale pasi tragjedia në të cilën ndodhen nuk është për fajin e tyre. Më tej Presidenti Topi inkurajon strukturat e qeverisë dhe të pushtetit vendor, që të realizojnë sa më shpejt të jetë e mundur sistemimin e këtyre familjeve, "të cilat kanë të drejtën legjitime për dëmshpërblim dhe për t’u sistemuar në kushte normale”- shkruhet në njoftimin për shtyp të Presidencës.
Më tej kreu i shtetit kërkon zbulimin sa më shpejt të përgjegjësve të tragjedisë së ndodhur në fillim të nëntorit dhe ndëshkimin e tyre ligjor.

Sipas skemës që është miratuar nga qeveria banorët që humbën shtëpitë e tyre, konkretisht apartamente 3 + 1, do të përfitojnë 3.2 milionë lekë bashkë me shifrën 400-500 mijë lekë për orenditë dhe pajisjet shtëpiake. Ata që humbën apartamentet 2+1 do të dëmshpërblehen me 2.4 mililionë lekë, plus dhe shifrën 400-500 mijë lekë për orenditë dhe pajisjet.

Banorët e kundërshtojnë skemën dhe thonë se shifrat nuk janë koherente me tregun aktual. Gjithashtu ato hedhin dyshime edhe mbi parregullsi në dokumentacionet e përpiluara. Banorët shprehen se nuk do ta pranojnë këtë dëmshpërblim pasi është shumë pak në krahasim me ato cfare kanë humbur.

Më 9 nëntor të këtij viti pallati i ngritur në një kodër në lagjen “11 janari” u shemb pjesërisht për shkak të punimeve që po ndërtoheshin në një pallat tjetër poshtë kodrës nga firma e ndërtimit “Arti shpk”. Tre persona gjetën vdekjen nën rrënoja, mbi 10 persona u plagosën, si dhe u arrestuan 12 persona si përgjegjës të kësaj tragjedie. Policia ndërtimore mori vendimin e shembjes së pjesës tjetër të mbetur nga pallati duke i lënë 13 familje në qiell të hapur.