Galiani: Tashme Anceloti duhet te fitoje titullin

Kur mungojnë pak ditë nga fillimi i kampionatit italian, Adriano Galiani duket optimist dhe flet për sezonin e ri të Milanit. “Besoj se Ançeloti duhet të jetë shumë i lumtur për afrimet që klubi ka bërë në këtë merkato vere. Megjithatë, lojtarët e ardhur do t‘i hapin trajnerit jo pak probleme, pasi tashmë ai duhet të fitojë titullin kampion në Serinë A”. blerjet në radhët e kuqezinjve janë mbyllur me afrimin në formë huazimi të Filip Senderos. Zv/presidenti i Milanit nuk lë vend për dyshime dhe thekson se cila do të jetë detyra e trajnerit: “Kjo skuadër i ka futbollistët dhe potencialin për të qenë kampione. Me këtë nuk dua të them se humbja e është e papranueshme dhe se rivalët nuk kanë asnjë shans, por se duhet të luftojmë deri në javën e fundit për t‘u renditur të parët”. Më tej, Galiani theksoi se “në çështjen Shevçenko nuk është folur asnjëherë rreth Rikardo Kakasë, apo transferimit të tij në Londër. Kemi dy vjet që e përsërisim se Riki nuk është në shitje dhe tifozët duhet të qëndrojnë të qetë. Për sa i përket largimeve, i vetmi që mund të mos jetë më pjesë e skuadrës është Paloski. Ndërkohë që Borrielo nuk lëviz”. Gjithsesi, e pasigurt duket edhe e ardhmja e Masimo Odos, për të cilin së fundmi është interesuar Lioni. “Kampionët e Francës na kanë bërë një ofertë, pohoi Galiani, por futbollisti dhe klubi ende nuk e kanë marrë një vendim”. Ndërkohë, administratori i klubit kuqezi theksoi se Senderos nuk do të luajë në javën e parë të kampionatit, “pasi ka një problem në shpinë dhe do jetë i gatshëm vetëm pas dhjetë ditësh”.