PolitikE-Prokuroria kërkon Bollanon

Shefi i policisë bashkiake të Himarës ka shkarkuar veten nga çdo përgjegjësi në lidhje me shkuljen e tabelave turistike-kulturore nga aksi i rrugës nacionale Llogora-Qeparo.
Dedi ka dhënë deklarimet e tij dje në Gjykatën e Rrethit Vlorë, ku ishte thirrur si dëshmitar në gjyqin në ngarkim të kryetarit të Bashkisë së Himarës,Vasillaq Bollano.

Kryebashkiaku akuzohet nga prokuroria për shpërdorim detyre, në rastin e shkuljes së tabelave turistike-kulturore që ishin të shkruara në gjuhën shqipe dhe angleze. Kreu i policisë bashkiake të Himarës, Aleks Dedi, u është përgjigjur pyetjeve të
prokurorit Sokol Malaj për veprimin e heqjes së tabelave të kryer prej tij, duke shmangur veten nga çdo përgjegjësi e duke ia ngarkuar gjithçka eprorit të tij, Bollano.

Ai ka deklaruar se me cilësinë e shefit të policisë bashkiake ka zbatuar urdhrin e nxjerrë nga kryetari i Bashkisë së Himarës.

Sipas Dedit, ka qenë një urdhër i nxjerrë nga Bollano, që ka çuar në heqjen e tabelave nga aksi rrugor Llogora– Qeparo, territor që administrohet nga Bashkia e Himarës.Prokurori i çështjes, Sokol Malaj,ka kërkuar që në seancën e ardhshme të thirret për t’u pyetur kryebashkiaku i Himarës, Vasillaq Bollano.

Por trupi gjykues nuk e imponon dot prezencën e tij në sallë,pasi ai është i pandehur dhe në bazë të ligjit ka të drejtën e përfaqësisë nga avokati në bazë edhe të prokurës së posaçme. Gjithsesi Malaj e ka renditur Bollanon në listën e personave që kërkon të dëgjohet nga gjykata.

Kryebashkiaku i Himarës do të marrë njoftimin zyrtar nga gjykata për këtë kërkesë të prokurorit, por mbetet në vullnetin e tij vendimi për t’u paraqitur apo jo në gjykatë.

Seanca e radhës në ngarkim të Bollanos është caktuar për në datën 19 shtator.

][/url][/img]