Juventusi kërkon Kosovarin Përparim Hetemaj

Drejtuesit e klubit të Juventusit kanë mbetur të mahnitur nga talenti i 19-vjeçarit kosovar, Përparim Hetemaj, i cili në rolin e tij mund të jetë pasardhësi i Aleksandro Del Pieros.

Një nga futbollistët që mund të veshë fanellën e Juventusit mund të jetë Përparim Hetemaj. Sipas gazetës greke “Ora për Sport”, posaçërisht për të parë këtë lojtar, klubi i Juventusit ka sjellë vëzhguesin e saj, Dejan Vasiljev, për të ndjekur ndeshjen e Kupës së Greqisë, Haidari-AEK. Rendimenti i tij në këtë ndeshje do të vendosë gjithçka. Sipas gazetës më të madhe të klubit grek, AEK, “ORA PËR SPORT”, drejtuesit e klubit të Juventusit kanë mbetur të mahnitur nga talenti i 19-vjeçarit kosovar, Përparim Hetemaj, i cili në rolin e tij mund të jetë pasardhësi i Aleksandro Del Pieros. Sipas kësaj gazete, shkëlqimi i tij në dy ndeshjet e Championsit i kanë dhënë një siguri të madhe klubit të madh italian Juventus, për moshën e re, si një debutues i rrallë dhe më i miri i dy takimeve. Vëzhguesi i klubit juventin, në fillim ka ardhur të shohë talentin dhe formën e tij, pastaj gjithçka do të vendoset nga drejtuesit e “Zonjës së vjetër”, të cilët për ta transferuar në “Del Alpi” u duhet të bisedojnë me drejuesit e AEK- nga ku Hetemaj ka një kontratë 4-vjeçare. “Talenti i tij është vlerësuar shumë, si nga drejtuesit e Juventesit, ashtu dhe nga Deshamp, pasi loja e tij kombinon shumë me atë të Kampionatin Italian. Ai është një lojtar energjik dhe i gjithanshëm. Me ato që kemi parë deri tani, Hetemaj me dinamikën e tij është më i përshtaturi për klubin e Juventusit”, - ka thënë vëzhguesi i Juventusit, Vasilev. I pyetur për interesimin që ka klubi i madh Juventus për të, Hetemaj përgjigjet për “Panorama Sport”: E mora vesh nga gazeta greke dhe është një çmim i madh për mua, që një klub i madh siç është Juventusi, të interesohet për mua. Unë tani jam pjesëtar i klubit AEK dhe do ta vlerësoj kontratën që kam firmosur deri në fund. Nëqoftëse të dy klubet do të bien dakort, atëherë për mua është ëndrra më e madhe që të vesh fanellën e Juventusit të madh. Është kënaqësi e madhe që të radhitesh së bashku me shqiptarët e tjerë në Serinë A, me Taren, Bogdanin e Behramin. Kryesore për mua është që kudo që të luaj të përfaqësoj me dinjitet kombin tim shqiptar”. Siç dihet, nëse klubi grek mund të bie dakort me vlerën e kosovarit, atëherë shumë shpejt në merkaton e verës, Përparim Hetemaj mund të kalojë te klubi Juventus. Nëqoftëse realizohet kjo ëndërr e madhe, me të vërtet Përparim Hetemaj do të jetë futbollisti i parë pas 60 vjetësh, pas Riza Lushtes, që do të veshë fanellën legjendare të “Zonjës së vjetër”. Forma e mirë dhe paraqitja dinjitoze e Përparim Hetemajt me bluzën e klubit të madh grek, AEK në ndeshjet e Championsit ka bërë që emri i tij të shënohet në listën e klubeve të mëdha Evropës, si dhe një nga talentet e mëdha të Evropës.