Dalin në shitje pronat e VEFA-s

Pas krijimit të fondit 10 milionë dollarë nga shitja e aseteve të firmës rentiere “Gjallica”, Grupi Mbikëqyrës i Fajdeve është duke planifikuar të njëjtën gjë edhe për pronat e VEFA-s.

Gazeta "Shqip" zbulon listën e objekteve që do të dalin shumë shpejt në ankand, ku mes tyre bie në sy vila trekatëshe e ish-bosit Vehbi Alimuça, e cila ndodhet në qendër të Tiranës.

Të ardhurat nga shitja e këtyre aseteve të mbetura tashmë nën administrimin e Grupit Mbikëqyrës të Fajdeve do të shërbejnë për likuidimin e rreth 16 mijë kreditorëve, të cilët nuk kanë mundur të marrin asnjë qindarkë nga paratë e humbura në fillim të vitit 1997.

Burime zyrtare nga Grupi Mbikëqyrës i Fajdeve bëjnë me dije se janë likuiduar rreth 78 për qind e kreditorëve, ndërkaq pritet të bëhet e njëjta gjë edhe për të tjerët, pasi të jetë mbyllur procesi i shitjes të aseteve, ish-pronë e VEFA-s.

Mësohet se janë 20 objekte, pra asete të pa shitura të shoqërisë huamarrëse VEFA. Për këtë qëllim, institucioni që po merret me këtë çështje, është duke përgatitur të gjithë kuadrin e mundshëm ligjor, i cili i hap rrugë zhvillimit të ankandit të hapur për shitjen e këtyre aseteve.

Për momentin, administratorët e Grupit Mbikëqyrës të Shoqërive Huamarrëse kanë bërë përllogaritë paraprake sesa do të jetë fondi, i cili do të krijohet nga shitja e këtyre aseteve, ku pjesa më e madhe shtrihet në jug të vendit.

Kreditorët

Për qeverinë shqiptare, vazhdon të mbetet i hapur procesi i likuidimit për kreditorët që kanë humbur paratë e tyre në shoqërinë huamarrëse VEFA, pronë e ish-bosit Vehbi Alimuça.

Janë gati 16 mijë persona që kanë humbur paratë, vlera e të cilës nuk bëhet ende e ditur, por që së shpejti do të mund të marrin një pjesë të saj.

Në këtë pikë, mësohet se koeficienti i kthimit të shumës nuk do të jetë më shumë se 10 për qind, megjithatë, përcaktimi i kësaj norme varet nga vlera totale që do të krijohet nga ankandi.

Aktualisht po përgatiten të gjitha dokumentet e nevojshme dhe pritet që së shpejti të bëhet publike oferta në ankand.

Janë 20 prona, që më parë i përkisnin Alimuçës, i cili aktualisht është duke vuajtur dënimin me 20 vjet heqje lirie.

Pronat

Në listën e gjatë prej 20 objektesh bie në sy vila e ish-bosit, Alimuça, e cila ndodhet në një nga zonat më të preferuara në Tiranë.

Më tej, duket se një pjesë e aseteve të VEFA-s janë të përqendruara në pjesën jugore të Shqipërisë, kryesisht në Skrapar, si: truall në fshatin Qafë, ndërtesë tek ish-fabrika e lëkurëve apo hotel “Gjerbes”.

Duke iu rikthyer pronave pranë Tiranës, administratorët e fajdeve kanë gati në shitje truall në pularinë e Paskuqanit, si dhe një ndërtesë dykatëshe në Yzberisht.