Provimet e vjeshtes, studentet kalojne vetem me 30% te krediteve

Të mbetesh në klasë në muajin shtator, është e rrezikshme. Humbet vitin akademik. Ndaj, të gjithë studentët duhen të bëjnë kujdes. “Është kusht marrja e 30% të krediteve të këtij viti, për t‘u hedhur në atë pasardhës”, u shpreh dekani i Fakultetit të Historisë dhe Filologjisë, Shezai Rrokaj. Por jo vetëm në këtë fakultet, edhe në gjithë të tjerët rregulli është i njëjtë, pasi i referohet Kartës së Bolonjës. Gjatë muajit shtator i drejtohen shkollave të larta mijëra studentë. Ata japin provimet e mbetura nga sezoni i qershorit dhe shkurtit. Por, nëse në vjeshtë vijnë të gjithë studentët mbetës pa limit provimesh, në vitin pasardhës kalojnë vetëm ata që marrin numrin e caktuar të krediteve. Ndryshe nga vitet e mëparshme, kur studentët kalonin në stazh me katër provime, tani nuk ka kushte për në vjeshtë. “Kemi lënë 8-10 data provimesh”, u shpreh dekani Rrokaj. Sipas tij, edhe studentët që kanë shumë lëndë të mbetura mund të hyjnë në vjeshtë, por duhet t‘i kalojnë ato në masën 30%. Një vit akademik ka gjithsej 60 kredite. Studenti duhet të fitojë 30 për qind të tyre për të marrë vitin.

Në ditën e parë të daljes së datave të provimeve, para fakulteteve prisnin një numër i vogël studentësh. Ata më të interesuarit për sezonin e provimeve. “Tani është fillimi, por deri në fund të javës paraqiten gjithë studentët mbetës dhe ata që kanë përmirësim note”, thonë sekretaret. Sipas tyre, studentët duhet të regjistrohen paraprakisht në lëndët e mbetura. Ata duhet të shënojnë pranë sekretarisë lëndën dhe datën kur duan ta japin provimin. “Provime ka çdo ditë nisur nga data 4 shtator”, thotë sekretaria mësimore e Fakultetit të Inxhinierisë Mekanike. Pranë Universitetit Politeknik janë afishuar datat e sezonit të vjeshtës për të gjitha fakultetet. Ashtu si në Universitetin e Tiranës, studentët duhet të kalojnë me 30 për qind të krediteve.

Rëndësia e lëndëve matet me kredite, kështu një lëndë mund të ketë një kredit dhe një tjetër 3. Në total studenti duhet të marrë 18 kredite nga një vit akademik për t‘u hedhur në vitin pasardhës. Bëhet fjalë për ata studentë, që kanë shumë lëndë për vjeshtë, pasi nuk duhet harruar fakti se ka mjaft studentë të mirë që kanë marrë thuajse gjithë kreditet e vitit akademik dhe kanë për vjeshtë pak lëndë dhe pak kredite për të shlyer.

Kryesisht mbetësit janë në vitet e para. Ata rrezikojnë të humbasin vitin akademik. Ndërsa në vitet më të larta, studentët e dobët janë më të pakët në numër. Këto të dhëna rezultojnë nga sekretaritë mësimore. Sistemi i Bolonjës aplikohet prej pak vitesh në vend. Këtë qershor dolën të diplomuarit e parë, të cilët morën Diplomën e Nivelit të Parë Bachelor. Kjo do të thotë se nuk ka më studentë të sistemit të vjetër katërvjeçar. Gjithë vitet janë me sistemin e ri, ndaj edhe vlerësohen me kredite. Në total janë 180 të tilla deri në diplomë, nga 60 kredite për secilin vit akademik. Më tej studentët mund të ndjekin diplomën e nivelit të dytë, dyvjeçare me 120

Burimi: Gazeta Shqip