Universitetet, mbyllet sot faza e parë e regjistrimeve

TIRANE- Fituesit e universiteteve të fazës së parë kanë afat deri sot në orën 18:00 të regjistrohen pranë sekretarive përkatëse, të cilat pohojnë se kanë vijuar normalisht procedurat e regjistrimit të kandidatëve që janë shpallur fitues që në fazën paraprake, ndërsa shtojnë se nuk ka pasur fluks të madh në këtë fazë të parë. Që do të thotë se në fazën e regjistrimit përfundimtar spostimi i listës së fituesve do të jetë me një numër të konsiderueshëm vendesh, falë edhe ndryshimeve që do të bëhen me zbritjet dhe ngjitjet e preferencave të kandidatëve fitues. Udhëzimi i Ministrisë së Arsimit dhe Shkencës, përcakton se kandidatët që nuk kryejnë regjistrimin paraprak brenda datave të përcaktuara në këtë udhëzim, për çfarëdo arsye, nuk do të përfshihen në listën përfundimtare të fituesve dhe do të humbasin të drejtën për të vazhduar studimet e larta për këtë vit. Listat përfundimtare e kandidatëve fitues, në formë të shkruar dhe elektronike do t’u dorëzohen Institucioneve të Arsimit të Lartë, në datën 25 shtator 2008 nga MASH. Kandidatët që janë shpallur fitues në listat përfundimtare, në një program tjetër studimi, të një preference të tyre më të lartë, do të çregjistrohen nga programi i studimit ku janë regjistruar paraprakisht, dhe të regjistrohen në programin e studimit ku janë shpallur përfundimisht fitues.