Topi përfaqëson Shqipërinë në OKB

Në sesionin e përvitshëm të Asamblesë së Përgjithshme të OKB-së, këtë herë Shqipëria do të përfaqësohet nga Presidenti i Republikës, Bamir Topi.

Kreu i shtetit shqiptar është ftuar nominalisht nga sekretari i Përgjithshëm i OKB-së, Ban Ki Mun, që të marrë pjesë në takimin e rëndësishëm në “Pallatin e Qelqtë” në Nju Jork.

Mbledhja e legjislativit të Kombeve të Bashkuara, e cila nis javën tjetër, ka një rëndësi të madhe, pasi pritet që të diskutohet për kërkesën e Serbisë, që Gjykata e Hagës të shqyrtojë ligjshmërinë e pavarësisë së Kosovës.

Pas pranimit që kjo çështje të futet në diskutim, Tirana zyrtare do t’i duhet të bëjë avokatin e Kosovës në organizmin më të lartë të Organizatës së Kombeve të Bashkuara.

Presidenti i Republikës, Bamir Topi, do të pasqyrojë jo thjesht pjesëmarrjen, por edhe kontributin e Shqipërisë, duke shprehur pikëpamjet e shtetit shqiptar për çështjet që ngrihen për diskutim si: reformimi i OKB-së (pika më e rëndësishme e diskutimeve për organizatorët) rishikimi i Strategjisë Globale të Luftës kundër Terrorizmit, diskutimi i arritjeve kombëtare dhe globale në lidhje me Objektivat e Zhvillimit të Mijëvjeçarit, ndikimi i krizës globale të ushqimit mbi varfërinë dhe urinë në botë, nevoja për të demokratizuar Kombet e Bashkuara.

Ky është forumi më i lartë ku Presidenti Topi do të vazhdoje të lobojë për njohjen e Kosovës.

Njohja e shpejtë dhe e plotë e Kosovës si shtet demokratik dhe i pavarur, do të shkurtonte ndjeshëm kohën e shtrirjes së hapësirës së sigurisë së NATO-s në rajon dhe do të lehtësonte përfshirjen e të gjithë rajonit në Bashkimin Evropian.

Presidenti i Republikës, Bamir Topi, pritet ta marrë fjalën e tij në Asamblenë e Përgjithshme të OKB-së, më datën 25 shtator, një ditë pas fjalës që do të mbajë në Nju Jork Presidenti i Serbisë, Boris Tadiç.

Kreu i shtetit shqiptar pritet të replikojë me shefin e Beogradit, i cili, sipas të gjitha gjasave, pritet të sulmojë pavarësinë e Kosovës.