Rama: PS baashkohet me shqetesimin e SHBA dhe te BE

Kryetari i Partisë Socialiste, Edi Rama, deklaroi të martën se forca politike që ai drejton “bashkohet me thirrjen e SHBA-së dhe të Bashkimit Europian në adresë të qeverisë së Shqipërisë, për të respektuar parimin e llogaridhënies përpara ligjit, pa ushtruar presion mbi njerëzit e ligjit”.

“I bëj thirrje Kryeministrit të vendit, që të tërhiqet pa humbur kohë dhe të mos lëvizë jashtë kufijve të detyrimeve të tij kushtetuese dhe ligjore, por të respektojë këtë shqetësim të madh të SHBA-së, BE-së, qytetareve e qytetarëve të këtij vendi”, tha kryesocialisti Rama në një konferencë për shtyp.

Ambasadorët e BE-së, të akredituar në Tiranë, u shprehën sot të shqetësuar nga zhvillimet e fundit në lidhje me sistemin e drejtësisë në Shqipëri. “Ne i bëjmë një thirrje të fortë të gjithëve, kryesisht qeverisë, të respektojnë dispozitat kushtetuese dhe parimet e mirëqeverisjes, pjesë e së cilës është edhe llogaridhënia para ligjit", thuhej në deklaratën e përbashkët për shtyp të ambasadorëve të BE-së.
Ndërsa, Ambasada e SHBA-së në Tiranë reagoi dje përmes zëdhënësit të saj, Biks Aliu, duke vlerësuar se "respektimi i të gjitha institucioneve të pavarura është me rëndësi thelbësore për një demokraci të shëndetshme".