Arrestohet ne Uruguaj ish-drejtuesi i "Popullit"

Arrestohet në Uruguaj, ish-drejtuesi i firmës piramidale "Populli" që vepronte në Shqipëri para vitit 1997.

Bashkim Driza u arrestua në këtë vend pas shpalljes në kërkim nga Interpoli, ndërsa mbi të rëndon akuza e mashtrimit në shuma të mëdha.

Gjykata e Tiranës e ka dënuar Drizën në mungesë më 16 vjet heqje lirie.

Sipas vendimit, shtetasi Bashkim Driza, gjatë viteve 1996-1997, në bashkëpunim me persona të tjerë ka krijuar fondacionin "Populli" dhe përmes kësaj veprimtarie ai ka mashtruar mbi 300 mijë persona, në shumën 870 milionë Lekë.

Driza ishte i pajisur me pasaportë uruguajane dhe domenikane, si dhe kishte lëvizur nga Uruguaji dhe Kili për në Republikën Domenikane dhe anasjelltas.

Po kryhen procedurat për sjelljen e Drizës në Shqipëri ku do të vuajë dënimin për veprën penale.