EKSKLUZIVE/Raporti për KE, Qeveria ‘mohon’ Gërdecin

TIRANE-Qeveria mashtron Komisionin Europian duke i prezantuar një raport të gënjeshtërt për progresin e bërë nga Shqipëria përgjatë një viti. “Gazeta Shqiptare” ka siguruar ekskluzivisht dokumentacionin prej 346 faqesh që ministrja e Integrimit, Majlinda Bregu do të dorëzojë në Bruksel ditën e martë, në të cilin ka jo vetëm shtrembërime të fakteve por edhe mospërmendje të problematikave që kanë shqetësuar vendin tonë. Qeveria rreh gjoksin se ka gjunjëzuar korrupsionin, por në asnjë rresht të vetëm nuk deklaron se me vendim të Parlamentit dy ministrave të saj, Lulzim Basha e Fatmir Mediu iu është hequr imuniteti e se janë nën hetim nga Prokuroria si të dyshuar në përfshirjen e aferave korruptive. Asnjë fjali për konfliktin me institucionet e pavarura e në veçanti me sistemin e drejtësisë. Por duke sfiduar faktorin ndërkombëtar, ekzekutivi përsërit pretendimin se në Shqipëri niveli më i lartë i korrupsionit është në organin e akuzës dhe gjykata. Pa harruar të shtojë mandej se nuk do të tërhiqet nga nismat që përmirësojnë situatën në sistemin e drejtësisë. Në raport nuk ka asnjë fjali për presionet e qeverisë ndaj medias së pavarur, si dhe për përdorimin e KKRT-së si vegël qorre për të goditur televizionet që i bëjnë oponencë kryeministrit.
Gërdeci
Skandali merr përmasa serioze kur në asnjë rresht të Progres-Raportit nuk përmendet tragjedia e Gërdecit. Ironia shkon përtej kur Ministria e Mbrojtjes vlerësohet në krye të institucioneve për suksesin e arritur në luftën kundër korrupsionit. “Me fonogram të veçantë të Ministrit të Mbrojtjes janë porositur të gjitha drejtoritë dhe Shtabi i Përgjithshëm të Forcave të Armatosura, si dhe Komandat e Forcave për të marrë masat e duhura, për luftën kundër korrupsionit”, citojmë nga ky dokument. Sikundër shihet ekzekutivi tenton t’i hedhë hi syve Komisionit Europian për një nga katastrofat më të rënda të ndodhura në Shqipëri gjatë dekadave të fundit, që solli humbjen e 26 jetëve të pafajshme, plagosjen e mbi 300 të tjerëve si dhe mijëra shtëpi e biznese të shkatërruara. Raport-Progresi i gënjeshtër që ministrja e Integrimit, Bregu do të dorëzojë në Bruksel, kur ndalet në çështjen e forcave të armatosura nuk përmend në asnjë fjali skandalin e tregtisë së armëve me kompaninë AEY.
Opozita
Në këtë dokument nuk ka asnjë rubrikë që të përfshijë oponencën e bërë nga opozita apo faktorë të tjerë që janë pjesë integrale e procesit të integrimit, sikundër janë organizatat jo qeveritare edhe pse ky raportim që i prezantohet KE-së duhet të jetë i palës shqiptare dhe jo vetëm i qeverisë. Këto të dhëna të shtrembëruara që i paraqiten Brukselit krijojnë një perceptim të gabuar për sa i përket identifikimit të problematikave që ka Shqipëria pasi i vetmi burim zyrtar informacioni mbetet ky raport. Komisioni Europian në hartimin e raport-progresit final për vendin tonë, veç konkluzioneve të veta do të mbështetet mbi këto të dhëna.